A fraude das emisións causou en Europa o endurecemento das medicións dos gases dos vehículos e a obriga dos fabricantes de manter un equilibrio exquisito entre o respecto ao medio ambiente e as prestacións do motor. Ese é o gran obxectivo da unidade mixta de investigación coa que o CTAG e Borgwarner queren crear en Galicia un polo de excelencia tecnolóxica para a mobilidade sustentable.

A industria agrolimentaria é un dos sectores máis innovadores da economía galega. Empresas que ven unha oportunidade de negocio nos novos hábitos de consumo. Como Galifresh, que naceu dunha rede de froiterías e hoxe vende os seus preparados frescos en España, Suecia, Francia ou Portugal. Agora traballa no que, sen dúbida, pode ser un produto revelación: os primeiros pementos de Padrón precociñados.

Prendas que se fabrican na outra punta do mundo nunha cadea sen descanso para renovar constantemente a oferta ao cliente. Maquillaxe que dura horas e horas. A industria da moda é cada vez máis sofisticada e require tamén unha maior supervisión da calidade. AMSLab lidera un consorcio de pemes galegas que prepara un novidoso prototipo de control de productos do téxtil e a cosmética antes de mandalos ás tendas.

O futuro das empresas é a innovación. Pero para Egatel xa vén sendo o núcleo da súa actividade desde hai 25 anos. A empresa ourensá pasou de ser unha pequena tecnolóxica a vender os seus produtos en máis de 40 países. A última novidade é un módem de comunicacións por satélite en colaboración con Eutelsat.

O diminuto corpo das lombrigas agocha unha potente depuradora natural. Comen restos e devolven nutrientes á natureza. Ecocelta foi a primeira empresa galega en aproveitalas para fabricar abonos ecolóxicos, moi demandados en agricultura, e agora trata con éxito os xurros das granxas de porcos, un dos residuos líquidos máis difíciles de eliminar.